Kuhlakanipha insayeya yemihla nemihla yawo wonkhe lophasi kwelilalanga. Kepha inkhungu ingumtfunti wesiwula.
Kuko konkhe longakwenta kukhuphula lizinga lemphilo yakho; cala ngekwenabisa ingcondvo yakho ngelwati.
Fundza, ukhaliphise ingcondvo kanye nelikhono lakho kakhulukati nalufaka ekhatsi umsebenti wetandla.
Esikhatsini sanyalo imisebenti seyimvela kancane, lokusho kona kutsi kuze ube nenchubekela phambili kufanele ube nelwati tsite ngemisebenti yetandla kute utawukwati kutiphilisa kanye nemndeni wakho.
Sisho sitsi; sifike emhlabeni singati lutfo kodvwa siloku sifundza sisakhula futsi kuyawutsi kufika sikhatsi setfu sekuwushiya lomhlaba siyawushiya netibonelo temandla etfu kanye netimfundziso kanjalo.
Umhlaba kawuphakanyelwa, umuntfu munye ngamunye unesizatfu sakhe ladalelwe sona ngekwamoya nangekwenyama. Kungumtfwalo nemfanelo yetfu kutsi sifeze leto tizatfu sifundzise netitukulwane kutsi ikakhulu imihambo nemasiko etfu atsini, ikakhulukati tsine sive lesinsundvu.
Umnyombo wetfu uyinsikela yetfu futsi ungumnotfo wetfu.
Kufanele sitiphutsate, sisebente ngekutikhandla kukhomba kutsi singebadzabuki bekucala, umlandvo wetfu ujulile kantsi futsi sinenhlakanipho nenhlonipho lebanti, sigucule lemicabango yaletinye tive ngebantfu labansundvu.
Kulilungelo lawonkhe wonkhe lonsundvu kutsi aphile, asebente, akhe futsi aphindze afundzise ngako ke lomlayeto lokulombhalo nawe wakho. Sukuma umele imfanelo netizatfu takho tekuphila, usaphila. Atibuyele emasisweni!
