Buhle bakho buyababateka
Buhle bakho buyamangalisa
Buhle bakho buhlobisa imvelo
Buhle bakho buyakhatimula
Bakubuka bavale emehlo
Batjelwe ngawe bavale tindlebe
Bahogeliswe wena bavale emakhala
Banambitsiwe wena bacudvule imilomo
Buhle bakho bushacisa lugogo
Usiyalu lesigobhota umlibe
Nsimu lemakhabakhaba
Labangakwati abakushayimkhuba
Linyenti liva ngetimbobo temuhlwa kujula kwebuhle bakho
Imbita iviwa ngelutsi kodvwa buhle bakho bugcame kuhle kwesagila emkhatsini wetinhloko tihlangene
Buhle bakho bugaya tinongo tenhlitiyo
Unyatsela umnyama unyamalale
Uvuselele inhlokomo ngekhatsi Kimi
Angiyakufela egaleni kuhle kwesinkhwe ngoba buhle bakho bunotsile
Kubhunya lutfuli uhamba
Unyatsela basulute tintsamo
Ahhh akuphunga uphetfuka buhle, bunandzi kanye nentfokoto
Labadzala batsi inhlitiyo ayiphakelwa kodvwa buhle bakho, buhle bakho bungisutsa mihla malanga onkhe. Buhle bakho bususa tonkhe tinsolo ngisale nelitsemba gugu lami
Buhle bakho buletsa emagagasi entfokoto. Awu! kwatsi angisukume ngigiye ngitigcabhe ngebuhle bakho, Dudlu khiwa lelihle, sinongo senhlitiyo yam, sikhumba lesimsheleleti, sicwebetela sengats ucatjuzwe imisebe yelilanga, matinyo kuhle kwesitfwatfwa, awu mehlo lajule kuhle kwalenkondlo yami, ahlaba kuhle kwetinkhanyeti esbhakabhakeni kusihlwa, tindzebe tinongitela kuhle kweluju, dudlu sukasambe wam, dudlu langelihle ntfomb lemnyama lenyatsela ngebantfwana, akusitfo yindlovukati uMntimandze lowafuta ekhabo nina, ugeza ngelubiso emant ahlet, lobhambo lomuhle, simomotfo senina
Buhle bakho bungange lwandlekati, abupheli futsi abugcini. Buhle bakho buvutsela emalangabi enhlitiyweni yami, buhle bakho bungishiya ngiciphita emachapoti etinyembeti, ngidzindze sililo ngitsi
‘MAYE, maye babe, kuhle kwetfu. Ematfonga ajabulile, lidloti lam liyangigidzela, Ligiya enkhundleni yetibiyo tenhliyo yami. Ahh tfokota gogo ubusise Mvelinchanti nabu Buhle lobungaka
Buhle bakho buyamangalisa
Buhle bakho buyababateka
